Համազգայինի «Գասպար Իփէկեան» թատերախումբի վարչութեան «խենթութիւնը»

Վարուժ Թէնպէլեան

Հայաստանի կրթութեան, գիտութեան, մշակոյթի եւ մարմնակրթութեան նախարարութեան Գիւմրիի «Վարդան Աճէմեան»ի անուան պետական դրամատիկական թատրոնը, կազմակերպութեամբ՝ Համազգայինի «Գասպար Իփէկեան» թատերախումբի վարչութեան, 7, 8, 9-10 Յունիսին, յաջորդաբար կը ներկայացնէ «Տունը Սահմանին», «Փարիզը վտանգաւոր քաղաք է» եւ «Քեռի Քուչին, Tom & Jerry» թատերախաղերը:

Իսկապէս ուրախալի է լիբանանահայ կեանքին մէջ տեսնել այս թատերական եռանդն ու եռուզեռը, որ լաւատեսութեամբ կը համակէ մեր հոգիները՝ մասնաւորաբար տնտեսական ու քաղաքական այս ճնշիչ մթնոլորտին մէջ:

Քանի մը տարիներու վրայ երկարող ակամայ բացակայութենէ ետք, արդէն գաղութիս թատերական կեանքի եղանակին բացումը կատարած են լիբանանահայ տարբեր թատերախումբեր, որոնց անխոնջ աշխատանքն ու նուիրումը արժանի են ամէն գնահատանքի: Կը լսենք. բոլոր ներկայացումները կ’արժանանան մեծ ընդունելութեան, որ ցոյց կու տայ մեր ժողովուրդին մեծ ծարաւը թատերական ու մշակութային ձեռնարկներու:

Գիտենք, թէ մարդկային ու նիւթական ի՛նչ զոհողութիւններով կ’իրականան այս բոլորը:

Սակայն, այս տագնապալի օրերուն, 15 հոգինոց թատերախումբ հրաւիրել «դուրսէն», այս պարագային՝ Հայաստանէն, քիչ մը «խենթութիւն» պիտի նկատուի շատերու կողմէ: Այս «խենթութեան» շարժառիթներուն ու նպատակներուն մօտէն ծանօթանալու նպատակով հանդիպում մը ունեցանք Համազգայինի «Գասպար Իփէկեան» թատերախումբի վարչութեան ատենապետ Մարտիկ Տեմիրճեանի հետ:

«Լիբանանահայ թատրոնը սիրողական է եւ բնական է որ այդպէս ըլլայ նկատի առնելով գոյութիւն ունեցող դերասանական ուժերը եւ դերասանութիւնը իբրեւ ասպարէզ ընտրելու դժուարութիւնները», ըսաւ ան: «Մենք յաճախ մտածած ենք մեր հանդիսատեսներուն արհեսավարժ երանգ ու ճաշակ հրամցնելու կարելիութիւններուն մասին եւ առիթներով իրագործած ենք այդ՝ Հայաստանի Համազգայինի «Սօս Սարգսեանի» անուան թատրոնին հետ գործակցաբար: Այդ գործակցութիւնը ծաւալեցաւ մինչեւ Գիւմրի՝ նաեւ «Վարդան Աճէմեան»ի անուան պետական դրամատիկական թատրոնին հետ: Գործակցութիւնը վերածուեցաւ բարեկամութեան, եւ իրերօգնութեան մթնոլորտ մը ստեծուեցաւ: Այս մթնոլորտը դիւրացուց Վարդան Աճէմեան»ի անուան թատրոնին այս այցելութիւնը Լիբանան», մանրամասնեց Մարտիկ Տեմիրճեան:

Բնակնօրէն, 15 հոգինոց թատերախումբի կեցութեան, սրահի եւ բեմայարդարումի ծախսերը հոգալը դիւրին գործ չէ: «Բարեբախտաբար, գործակցութեան ոգին եւ այս նախաձեռնութեան նկատմամբ առկայ հաւատքը մեղմացուցին նաեւ նիւթական դժուարութիւնները: Նախ այս առիթով շնորհակալութիւն կ’ուզեմ յայտնել Գիւմրիի «Վարդան Աճէմեան»ի անուան պետական դրամատիկական թատրոնի գեղարուետական ղեկավար եւ տնօրէն Լութֆիկ Յարութիւնեանին` անոր տրամադրած բոլոր դիւրութիւններուն համար: Այս գործին նպաստեց նաեւ Հայաստանի կրթութեան, գիտութեան, մշակոյթի եւ մարմնակրթութեան նախարարութիւնը: Իսկ Լիբանանի մէջ, իսկապէս երախտապարտ ենք Համազգայինի եւ «Գասպար Իփէկեան» թատերախումբի բարեկամներուն, որոնք, իւրաքանչիւրը՝ իր կարողութեան չափ նիւթական օժանդակութիւն տրամադրեց այս գործին յաջողութեան համար», ըսաւ Մարտիկ Տեմիրճեան:

Արդարեւ, Գիւմրիի «Վարդան Աճէմեան»ի անուան պետական դրամատիկական թատրոնը լիբանանհայ թատերասէրներուն պիտի հրամցնէ լեհ թատերագիր Սլամովիր Մրոժէքի «Տունը Սահմանին» քաղաքական բովանդակութեամբ թատերախաղը, բեմադրութեամբ՝ Արտուշ Միքայէլեանի: «Թատերախաղը ունի այժմէկան բնոյթ եւ կը յիշեցնէ Արցախի հարցը», դիտել տուաւ Մարտիկ Տեմիրճեան:

Երկորդ թատերախաղը՝ «Փարիզը վտանգաւոր քաղաք է» կատակերգութիւնը կը պատկանի ֆրանսացի թատերագիր Քլոտ Մանիէի գրիչին. խնդուք պատճառող ֆարս մը, բեմադրութեամբ՝ Լութֆիկ Յարութիւնեանի:

«Լիբանանի մէջ կարեւոր բացակայ է մանկապատենական թատրոնը: Այդ նպատակով, մանաւանդ որ գրեթէ նոյն դերասաններով կը կատարուի ներկայացումը՝ որոշեցինք նաեւ բեմ բարձրացնել Յ. Թումանեանի «Շունն ու կատուն» պատմութեան այժմէկանացուած տարբերակը՝ «Քեռի Քուչին, Tom & Jerry» վերնագրով», բացատրեց Մարտիկ Տեմիրճեան:

Այս առիթով, յաջողութիւն կը մաղթենք հայրենի արուետագէտներուն եւ վարձքը կատար կ’ըսենք հայ մշակոյթի բոլոր սպասարկուներուն:

Կը մնայ, որ տոմս գնելով թատերասրահ ուղղուելու տրամադրութիւնը վերածենք կիրքի եւ իրաւ վայելքի: