Մարալ եւ Ժիրայր Փանոսեաններ. Երբ արուեստը կը կամրջէ հայրենիքն ու սփիւռքը

Անցեալ օգոստոսին, երբ Մարալ եւ Ժիրայր Փանոսեանները կը պատրաստուէին իրենց «Dream, Art, Yerevan» ցուցահանդէսին, «Տարբերակ» յատուկ գրութեամբ անդրադարձաւ անոնց ստեղծագործական ուղիին եւ Երեւանի մէջ կայանալիք ցուցահանդէսին։ Յօդուածը կը փակէինք հարցադրումով մը. «ի՞նչ նոր հորիզոններ կրնար բանալ այդ հանդիպումը Հայաստանի եւ անոր արուեստասէրներուն հետ»։ Այսօր Մարալն ու Ժիրայրը արդէն կը գտնուին Լիբանան, եւ առիթը ունինք զրուցելու ո՛չ միայն Երեւանեան ցուցահանդէսին, այլեւ արուեստի, ստեղծագործութեան, սփիւռքեան ինքնութեան եւ արուեստի կրթութեան մասին։