«Միսը Ձեզի, Ոսկորը Ինծի» (2)
February 25, 20242004 թուականին Ազգային Հայկազեան Վարժարանի մանչերու բաժինը միանգամընդմիշտ փակեց իր դռները, եւ անոր աշակերտութիւնը ամբողջութեամբ տեղափոխուեցաւ աղջկանց բաժին, որ ատենօք կը գործէր Թիլելի Ֆարհաթ հրապարակէն քայլեր անդին:
Շաբաթը եօթը օր նորօք փակեալ դպրոցը յաճախելէ ետք, կարծեմ անգամ մըն ալ չգացի հոն: Շաբթուան առաջին վեց օրերը որպէս աշակերտ կը յաճախէի այնտեղ, եօթերորդ օրն ալ «հանգիստ»-ի փոխարէն որպէս ՀՄԸՄ-ական գայլիկ կը մտնէի այդ դարպասէն ներս: Վտիտ մարմնիս անհամաչափ այդ խոշոր գլուխէս վար, կը կապուէր դեղին փողկապս, որ ծոծրակիս վրայ եռանկիւն մը կազմած առջեւ կու գար երկու թեւերով մինչեւ վերջին կոճակը փակուած կապոյտ շապիկիս վրայ: Այդպէս կը դառնայի «տիպար» գայլիկ մը, որուն համար «ասկէ աղուոր բան չկար»…
Կարծեմ շատ չէի հասկցած սկաուտութիւնը ինչի մասին էր օրին:
Շատ ալ սիրելով չէի երթար, հակառակ անոր որ այնտեղ յաճախել սիրցնող մարդիկ կային (ինչպէս եղբայր Հրանտ Սանոսեանը եւ քոյր Կասիա Կարապետեանը), բայց կ’ենթադրեմ որդեգրած կեցուածքս այն պատճառով էր, որ իմ միա՛կ արձակուրդի օրը, երբ կրնաս ուշ արթննալ, այս սկաուտութիւնը կը խլէր ինձմէ: Այդ միջավայրէն աւելի խրտչեցայ, երբ օր մը ինձմէ խնդրեցին անոր նշանակը ճիշդ գոյներով ներկել, եւ ես կարմիր-կապոյտ-նարնջագոյնով ներկեցի անոր բաժինները յաջորդաբար՝ վերէն վար: Թէեւ աչքիս լաւ չերեւցան գոյներուն տեղերը, ստացուած պատկերը, սակայն հայկական ինքնութիւն ունեցող այս միութեան նշանակը Հայաստանի գոյներով պէտք չէ՞ ներկուած ըլլայ, ինչպէ՛ս գոյներու ուրիշ կարգ կրնայ ունենալ…
Նիշ չտուին: Ըսին, թէ ճիշդ չեմ գունաւորած եւ ես, խռովայոյզ, կեցուածք որդեգրեցի ու անգամ մըն ալ չուզեցի երթալ սկաուտական հաւաքներու:
Այդ դէպքը կարծեմ հոնկէ խուսափելու յարմարագոյն պատրուակս էր:
Անգամ մըն ալ չմտայ այդ դպրոցէն ներս:
***
Ֆարհաթ հրապարակէն դէպի մեր նոր դպրոցը տանող ճամբան քալելով պէտք էր երթալ, որովհետեւ Հալէպի հին քաղաքի քարապատ, գեղեցիկ եւ նեղ արահետներէն մէկն էր, որուն ձախ կողմի պատէն մագլցելով՝ մեր կողմ վար իջած էին դամասկոսեան բուրումնաւէտ յասմիկներ:
Կարելի չէր այնտեղ ինքնաշարժներով մտնել: Օթոքարները կը կենային հրապարակ եւ մենք անոնցմէ իջնելով, կենդանութեամբ կը լեցնէինք հազարամեայ այդ քարաշէն ճամբան: Մեր դոփիւնի արձագանգները կը ձգէինք անոր կամարներուն տակ եւ կ’երթայինք դէպի լոյսը գիտութեան:
Կ’ուղղուէինք դէպի մեր դպրոցին դուռը, որուն մուտքին մի՛շտ նստած կ’ըլլար պարոն Խաչիկը՝ կամ բոլորին ծանօթ «Խաչօ»-ն:
Խաչոյէն անդին ճամբան կը շարունակուէր, բայց աշակերտներուս համար անկէ անդին տարածքը առեղծուած մը կը մնար, որովհետեւ Խաչօն թոյլ չէր տար աշակերտներուն իր աթոռով գծուած սահմանէն անդին անցնիլ:
Պարոն Խաչիկը դպրոցի հայրիկն էր, անոր դռնապանը, կառոյցի շինարարական եւ սուրհանդակային գործերու առաջին դէմքը եւ նուիրեալը, շէնքին մէջ կատարուած աշխատնքներու ու նորոգութիւններու արթուն պահակը:
Գորշ մորթագոյն ժագէթէն միշտ դուրս կը մնար իր ցցուն որովայնը, որ յաւելեալ հարազատութիւն մը կը հաղորդէր իր բարի նկարագրին: Անոր առնական դէմքին վրայ ժպիտը որեւէ պահու այցելու կրնար ըլլալ, այդ իսկ պատճառով ալ աշակերտներս զինք դասեր էինք «բարի» հայրիկ-մայրիկներու շարքին: Անոր ձայնին մէջ բարակութեան նրբերանգ մը կար, որ վստահելի անձ մը կը դարձնէր զինք աշակերտներուս համար: Որքան ալ ձայնը բարձրանար, կամ դառնար թաւ՝ միշտ ալ խրատական ոճով կը տարազուէր ու կը շարունակէր հանգստութիւն տալ մեզի: Իմ պարագայիս, ա՛լ աւելի նուրբ կէտ մը կար, որով ամբողջական կը դառնայ աշակերտի մը համար այս սերտ կապը: Կապը պաշտօնի մը հետ, որ շատերու կողմէ միշտ ալ իր արժանի գնահատանքը չի ստանար:
Հայրս ամէն դպրոց հանդիպելուն բարեկամական, ընկերային պզտիկ զրոյցներ կ’ունենար Խաչոյին հետ եւ այդ մէկը յաճախ կ’ըլլար արաբերէն լեզուով: Եւ այդ արաբերէն երկխօսութիւնը ինքնին յաւելեալ մտերմութիւն մը կը սեպուէր ինծի համար, յատուկ գուրգուրանք ու շոյանք մը, որովհետեւ իւրաքանչիւրը կը խօսէր ի՛ր բառերով, անկախ միջավայրի ու պաշտօնի ազդեցութենէն եւ այդ կը դառնար հարազատութեան յաւելեալ ազդակ մը:
Մեզի համար դպրոցը կը սկսէր պարոն Խաչիկին քովէն, ո՛չ միայն կառոյցի մուտքին առումով, այլ նաեւ կրթական համակարգի որպէս արժէք:
***
Այստեղ դպրոցը երեք յարկանի շէնք մըն է: Ա. եւ Բ. կարգերը առաջին յարկն էին՝ տնօրէնութեան եւ մայրիկներու սենեակներուն հետ միասին: Գ., Դ. եւ Ե. կարգերու մեծամասնութիւնը երկրորդ յարկի վրայ՝ ուսուցչարանին երկու կողմերը բաժնուած էին, իսկ երրորդ յարկը ընդհանրապէս Զ. կարգի աշակերտներուն էր, բացի Ե. կարգի մէկ բաժինէն (երբ Ե. կարգ էի, այդ բաժինը եղայ):
Դպրոցը ունէր երկու բակ. մէկը գետնայարկի շրջափակն էր, որուն հարաւային կողմը դուռով մը կը բաժնուէր Սրբոց Քառասնից Մանկանց Մայր եկեղեցիէն: Շրջափակի արեւելեան կողմի դուռէն կարելի էր «Ահարոնեան» սրահ անցնիլ եւ այդ դռան վերը՝ առաջին յարկի վրայ, պետական տնօրէնին պատշգամն էր: Չարաճճիութիւն մը չըրած, աչք մը կը նետէինք այդ պատշգամին վրայ, ստուգելու համար «խնդրոյ առարկայ»-ին բացակայ ըլլալը:
Այս շրջափակի մուտքի դուռին մէկ կողմը, մարդու միջին հասակի բարձրութեան վրայ, պատէն ցցուած երկար երկաթի մը եզրէն կախուած էր դպրոցի զանգակը, որուն լեզուակի յարակրկնուող հարուածներուն շնորհիւ, վերջ կը տրուէր զբօսանքի խառնիճաղանճին:
Երկրորդ դասարան էի, եւ առաջին չորս կարգերը, մենք անոնցմէ մէկը ըլլալով, իրենց զբօսանքը կ’անցընէին գետնայարկի շրջափակէն ներս:
Իւրաքանչիւրիս մէջ երազ մըն էր սակայն երրորդ յարկի բակը, որ տրամադրուած էր մենաշնորհեալ Ե. եւ Զ. կարգերուն: Այս մարդիկը ո՛չ միայն յատուկ բակ ունէին, այլ նաեւ իրենց յատուկ դպրոցական տարազ, որ բոլորովին տարբեր էր իր ձեւով: «Ստորներս» գոգնոց կը հագնէինք, իսկ դպրոցի այդ «մեծամեծները»՝ գազակ կամ շապիկ: Մենք մատիտով կը գրէինք, իրենք՝ գրիչով: Դպրոցի մէջ խօսքը իրենցն էր, բայց դպրոցէն դուրս ալ, օթոքարներուն մէջ՝ տեղեր գրաւելու նենգամտութեամբ, անոնք կ’օգտագործէին աւելի կանուխ աշխարհ գալու իրենց պայմանադրական պարագան…
Բայց մենք անթեք կերպով կը շարունակենք մեր ճամբան:
Կը սորվինք մեր դասանիւթերը, կը յաջողինք տարուան աւարտին եւ կը բարձրանանք կարգով ու յարկով այս դպրոցին մէջ: Միշտ ի մտի ունենալով, որ մենք ալ երբ գոնէ հինգերորդ կարգ ըլլանք, պիտի ըլլանք «մեծերը» այս դպրոցին եւ ոչ թէ «միւսները» անոր…
Պէյրութ, 24 Փետրուար 2024
Ապրիս Քրիստ, նկարագրութիւնդ միացուած պատկերներուն գրութեանդ տուած է վաւերագրական երեւոյթ զոր հաճոյքով կարդացի վերապրելով դպրոցի ճամբան, նկատի առած որ աւելի քան տասնամեակ մը պաշտօնավարած եմ այդ վարժարանը։
Ուշադրութիւն.
–պէտք չէ ըսել որմով, այլ որով:
–գոգնոց կը հագուէինք
Հագուիլ չէզոք է, չի կրնար ուղիղ խնդիր առնել.
ներգործականն է հագնիլ. ուրեմն՝ գոգնոց կը հագնէինք:
–ի միտի չենք ըսեր, այլ ի մտի:
Շնորհակալութիւն տոքթոր:
Արբագրուեցան:
Յուզումով կարդացի կտորը: Իմ կարգիս, ես ալ եղած եմ Հայկազեանի աշակերտուհի, եւ շաբաթ օրերը, որպէս արծուիկ՝ կը յաճախէի քու նշած նո՛յն Հայկազեանի տղոց բաժինը, որմէ շատ հեռու չէր սխտորի բոյրով յագեցած Ապտոյին ֆուլի կրպակը: Իմ Հայկազեանս հինն էր, (կարծեմ այսօր թանգարանի վերածուած) գործածուած գիրքեր ծախող պարոն Ռուբէնին խանութին ճիշդ դիմացը, ոսկերիչներու փողոցին շարքին մէջ խցկուած նեղ դուռով: Մեր դպրոցը կ’այցելէին եւրոպացի գիտնականներ, ճարտարապետներ կամ՝ հնագէտներ, ընդհանրապէս՝ գերմանացի կամ մեր չհասկցած լեզուներով խօսող մարդիկ:
Մեր բակին մէջ կար լիվան մը, ուր զբօսանքին, աղջիկներով, անոր գունաւոր սալիկներով յատակին վրայ «գիծ» կը խաղայինք: Անիկա նաեւ կը ծառայէր որպէս բեմ, ուր 6րդի աղջիկները ամէն չորեքշաբթի եւ ուրբաթ առտուները արեւագալի երգերը կ’երգէին: «Լո՜յս, արարիչ լուսոյ արեգական…»: Դպրոցին տակ լայնատարած, դարերու փոշիով ծածկուած մառան էր, «ուր, ըստ մեր դասարանցի Հայկուշին, ոգիներ կ’ապրէին, եւ գիշերը միայն դուրս կու գային»: Ըսել կ’ուզեմ, ոգիներով ու կախարդներով ապրուած հին, բայց մեզի համար ամէն օր մաքրուած մեծ պալատն մըն էր մեր դպրոցը, ուր, ո՞վ կրնար չհաւատալ, դպրոցին չարերը կը պատժուէին, կը բանտարկուէին օրերով, անօթի, ծարա՜ւ:
Մեր 4-րդ կարգի դասարանին մէջ կար օճառաբոյր քարի վրայ փորագրուած զարդանաշխերով կրակարան-օճախը: Պզտիկ բան չէր, մենք 2 նոյնիսկ 3 հոգիով կրնայինք մէջը նստիլ: Հրաշքը՝ բոյրն էր: Մատներդ եթէ քարին քսէիր քիչ մը, հնաբոյր օճառի բոյրը ամէն անգամ ալ կը զարմացնէր մեզ: Դասարան չէր, սրահ մըն էր, միակը՝ ուր կարելի եղեր էր 44 հոգինոց դասարանի մը համար նստարան ու աթոռ ճարել: Այդ դասարանը ունէր երկար անցք մը եւ երկու դուռ, դէմ դիմաց, ուրկէ ձմրան բուքը կը սառեցնէր մեր տոտիկները, հակառակ մազութով վառող վառարանին:
Դժբաղդաբար, քանի մը տարի առաջուան Հալէպի երկրաշարժն ու պատերազմը շատ բան քանդած էին: Հեռուստատեսիլը ցոյց կու տար մեզ առաջին եւ երկրորդ դասարան տանող սանդուխները հիմա կախուած բազրիքներով, զորս կ’օրօրուէին անտէր, անտիրական:
Որքան գոհացած կը զգամ քու պատմածովդ մեր նորակառոյց Հայկազեանին մասին, որ կը գտնուի բոլորիս հարազատ ծուռիկ-մուրիկ եւ հին սալաքարերով փողոցներու մէջ: Գրութիւնդ յուշերս զգեցուց Հալէպական գոյն ու բոյրով, քայլ առ քայլ, բակ առ բակ, եւ երեկոյեան՝ դասարանէն նոր դուրս եկած աշակերտի գոգնոցի հոտ:
Ահա այդ նորակառոյց Հնայկազեանն է, ուր, տարիներ ետք, դժբախտաբար, յաճախած եմ միայն մէկ տարի, որպէս ուսուցչուհի:
Կը շնորհաւորեմ քեզ, քու ոճիդ անմիջականութեան, պատմելու շնորհքիդ եւ մանաւանդ՝ հիւմուրիդ համար, որով կը յաջողիս կեանք տալ մեր յուշերուն: Իսկապէս, այդ ամէնը ճանաչելի ու հարազատ դարձնողը քու համով-հոտով նկարագրած ոչ միայն դպրոց-փողոց-բակերն էին, այլ հոն բաբախող կեանքի պատառիկները, շօշափելի դարձած՝ կտորին ընկերացող պատկերներով, ուրկէ տակաւին կարելի էր լսել աշակերտներու կօշիկներուն ձայներն ու ժխորը: