Բնագիտութեան (Physics) 54-րդ միջազգային ողիմպիականին հայ աշակերտներ նուաճած են երեք պրոնզէ մետալ: Ողիմպիականին, որ տեղի ունեցած է 21-29 յուլիսին, Իսֆահանի մէջ (Իրան), մասնակցած են 197 ներկայացուցիչներ 46 երկիրներէ:

Արսեն Աղայեան (12-րդ դասարան) եւ Նարեկ Գալստեան (11-րդ դասարան) PhysMath յատուկ դպրոցէն, իսկ Հայաստանի ազգային արհեստագիտական (Polytechnic) համալսարանի երկրորդական վարժարանի բաժնի 12-րդ դասարանի աշակերտ արժանացած են պրոնզէ մետալներու, իսկ Նարեկ Մոսիսեան (12-րդ դասարան, PhysMath յատուկ դպրոց) եւ Արմէն Գազազեան (12-րդ դասարան, Հայաստանի ազգային արհեստագիտական համալսարանի երկրորդական վարժարան) արժանացած է յատուկ յանձնարարականի:

Աշակերտական պատուիրակութիւնը կը ղեկավարէին Ա.Շահինեանի անուան բնագիտութեան յատուկ դպրոցի ուսուցիչներ Բիլոր Կուրղինեան եւ Մեխակ Հայրապետեան եւ Հայաստանի ազգային արհեստագիտական համալսարանի երկրորդական վարժարանի բնագիտութեան ուսուցիչ Ալֆրետ Պետրոսեան:

Նշենք, որ Ճափոնի մէջ կայացած բնագիտութեան նախկին 53-րդ միջազգային ողիմպիականին, Հայաստանի հաւաքականը նուաճած էր 1 արծաթէ եւ 4 պրոնզէ մետալ:

Միւս կողմէ, Սէուտական Արաբիոյ մայրաքաղաք Ռիատի մէջ կայացած քիմիագիտութեան 56-րդ միջազգային ողիմպիականին, 21-30 յուլիսին, հայ դպրոցականներ ապահոված են 4 պրոնզէ մետալ: Մրցոյթին մասնակցած են 88 երկիրներէ 327 մասնակիցներ:

Հայաստանի հաւաքականին մաս կը կազմէին Արման Խառատեան (11-րդ դասարան) եւ Արտաւազդ Արապաչեան (12-րդ դասարան) Վանաձորի ուսողութեան եւ բնական գիտութիւններու ​​բարձրագոյն ուսումնական հաստատութենէն, Quantum գոլեճի աշակերտ Սերգեյ Թադեւոսեան (12-րդ դասարան) եւ Սեւանի երկրորդական վարժարանի աշակերտ Բենիամին Հայրապետեան (12-րդ դասարան):

Հաւաքականին ղեկավարն էր Օրկանական եւ դեղագործական քիմիագիտութեան գիտական եւ արհեստագիտական կեդրոնի գիտաշխատող Անդրանիկ Դաւինեան:

Քիմիագիտութեան անցեալ 55-րդ միջազգային ողիմպիականին Հայաստան նուաճած էր 1 ոսկի եւ 2 պրոնզ մետալ: