Դերասաններ որ մէկ դերով կը յիշուին
January 25, 2025
Հռչակաւոր դերասանները կա՛մ ատակ են, կա՛մ բախտաւոր. կամ ալ պատահմամբ յայտնի դէմք դարձած են:
Ատակը՝ տաղանդաւոր եւ բախտաւորը՝ առեւտրական չափանիշերու համապատասխանած, մշտական գործերով բոլորին յիշողութեան մէջ կը մնայ:
Հետաքրքրականը պատահմամբ հանրածանօթ դարձողին պարագան է: Առաջինը որ միտքէս կ’անցնի անգլիացի դերասան Robert Powell-ն է(1), որ 1977-ին Յիսուսի դերը մարմնաւորեց Jesus of Nazareth կարճ ֆիլմաշարին մէջ: Robert Powell, Յիսուսի դերը մարմնաւորելէ առաջ եւ ետք, բաւական դերեր խաղցած է, որոնցմէ ոչ մէկը կը յիշուի այսօր:
Երբ կ’որոշուի Jesus of Nazareth-ի ծրագիրը, Յիսուսի դերով նկատի առնուած են Dustin Hoffman եւ Al Pacino. բեմադրիչ Franco Zeffirelli որոշած է աշխատիլ դերասանի մը հետ, որ մարմնով եւ դէմքով նմանի Յիսուսին, հիմնուած դարեր շարունակ օգտագործուած՝ The Shroud of Turin-ի(2) դէմքին եւ Warner Sallman-ի գծած Head of Christ(2) նկարներուն վրայ: Ծրագրին պատասխանատուները որոշած են Յիսուսը ներկայացնել երկարահասակ, երկար մազերով եւ կապոյտ աչքերով դերասանի միջոցով: Եւ այսպէս Robert Powell(2) ինքնաբերաբար դարձաւ Յիսուս ներկայացնող դէմքը եւ երբ Յիսուս ըսուի մարդոց մտքին մէջ իր դէմքը կը գծուի, բայց հակառակը՝ ոչ:
Հետաքրքրական է, որ օրին, երբ Robert Powell ընդունած է այս դերը, կ’ապրէր իր ընկերուհիին հետ, առանց պսակուելու, ինչ որ քրիստոնէութիւնը կը մեղադրէր: Այս պատճառով, կարճ ժամանակ վերջ պսակուած են:
Jesus of Nazarethին մէջ, Յիսուսի մօր` Մարիամի դերը մարմնաւորած դերասան Olivia Hussey-ն(3) սակայն մինչեւ օրս կը յիշուի 1968-ին Franco Zeffirelli-ի Romeo and Juliet ֆիլմին մէջ Juliet-ի դերով: 16 տարեկանին խաղցած իր առաջին գլխաւոր այս դերը շուքի մէջ կը ձգէ իր ասպարէզին միւս գործերը: Իսկ Romeo-ի դերը խաղցած Leonard Whiting-ը(3) այդ դերէն զատ բնաւ չի յիշուիր:
Օրինակները շատ են:
Մեր օրերուն երբ ըսենք Superman(4), մեր աչքերուն առջեւ կու գայ Henry Cavill, բայց երբ ըսենք Christopher Reeve ինքնաբերաբար կը պատկերացնենք Superman-ի առաջին ֆիլմերու շարքը (չորս հատ): Այնքան մը, որ 2004-ին, երբ Christopher Reeve մահացաւ, ըսուեցաւ որ Superman-ը ոչ եւս է:
Sean Connery(5) որ բաւական հանրածանօթ դերասան է իր տարբեր genre-ի ֆիլմերով, ինչպէս The Untouchables եւ Indiana Jones and the Last Crusade, իր յատկանշական ձայնով ու արտաքինով, միշտ ու միշտ կը յիշուի իբր James Bond: Իր իւրայատուկ ձայնով եւ առոգանութեամբ «Bond, James Bond»ը կարծես թափ տուաւ այս կերպարի ֆիլմերու շարունականութեան եւ յաջողութեան:
Christopher Lee(6) տարիներ շարունակ կը յիշուէր իբր Dracula. 2001ին, երբ սկսաւ The Lord of the Rings-ը, ան այդ ֆիլմաշարին մէջ մարմնաւորեց Saruman-ի դերը՝ ճերմակ եւ երկար մօրուքով ու մազերով կախարդի դերը եւ այդ ժամանակէն ի վեր, Leeի անունը հաւասարեցաւ Saruman-ի:
1990էն ի վեր, ամէն տարի կաղանդի շրջանին կը դիտենք կամ կը վերյիշենք Home Alone կամ Home Alone 2 ֆիլմերը. այդ ֆիլմերուն հերոսը՝ Macaulay Culkin(7) մ
ինչեւ օրս կը յիշուի իբր Kevin McCallister:
Այլ օրինակ մըն է Daniel Radcliffe(8) իր Harry Potter-ի կերպարով, զոր ութ անգամ կրկնած է:
Կան այլ դերասաններու օրինակներ, որոնք հակառակ իրենց երկար տարիներու ընթացքին խաղցած զանազան դերերուն եւ գտած յաջողութիւններուն, կը յիշուին միայն ու միայն մէկ յատկանշական դերով յատուկ ֆիլմի մը մէջ, այսպէս՝ Julie Andrews՝ The Sound of Music եւ Mary Poppins(9), Charlton Heston՝ Ben-Hur, The Ten Commandments(9) եւ Planet of the Apes, Robert Downey Jr՝ Iron Man(9):
Այս դերասանները իրենց կատարեալ մարմնաւորումով հանդիսատեսին մտքին մէջ դրոշմեցին իրենց առանձնայատուկ դերերը, այնքան մը որ եթէ մէկը դերասանին անունը մոռնայ, անպայման այս ֆիլմերուն մէջ անոնց ստանձնած դերին անունով կը խօսի:
