Շաբաթ մը Հայքին մէջ

«Առաջատար հետազօտութիւններու մրցոյթ»ին արդիւնքները․․․ From Moon to Mars միջոցառումը․․․«Ճարտարագիտական շաբաթ»․․․ Արմաթ գիտաշխանոցներ․․․ EPAM մասնաճիւղ Գորիսի մէջ․․․․ GDG DevFest Վանաձորի մէջ․․․ Աջափնեակի մեթրոյի կայարանի կառուցում․․․եւ այլ նորութիւններ։

Կայացաւ reArmenia 1.0 միջոցառումը, որուն ընթացքին ներկայացուեցան reArmenia-ի համահայկական համագործակցութեան տեսլականը, այդ տեսլականին շուրջ հաւաքուած մարդոց խումբը, հարթակին մէջ արդէն ներկայացուած ծրագիրներն ու նախաձեռնութիւնները:

Շուտով կը գործարկուի reArmenia համագործակցութեան եւ դրամահաւաքի հարթակը:

«Թումօ»ն յայտարարեց, որ մեկնարկած է «Թումօ Հայաստան» ծրագիրը: Կը նախատեսուի քանի մը տարուան ընթացքին հաւաքել 50 միլիոն ամերիկեան տոլար, որուն շնորհիւ պիտի կառուցուին 16 նոր «Թումօ» կեդրոններ եւ 110 «Թումօ տուփեր» Հայաստանի տարածքին: Եմենիճեան ընտանիքը արդէն տրամադրած է առաջին 10 միլիոնը:

Հայկական մատենագրութեան թուանշային գրադարանը (digilib) յայտարարեց, որ աւարտած է Յակոբ Օշականի գրաւոր ժառանգութեան թուայնացումը․

Աւարտեցաւ Սփիւռքի յանձնակատարի գրասենեակին «իԳործ» ծրագիրին առաջին տարին, որուն ծիրին մէջ 19 տարբեր երկիրներէ 55 սփիւռքահայեր եկան եւ աշխատեցան Հայաստանի պետական մարմիններուն մէջ: Առնուազն 14-ը որոշած են մնալ Հայաստան եւ շարունակել աշխատանքը: Արդէն սկսած է երկրորդ տարին, նոր մարդոցմով:

Picsart ընկերութիւնը 130 միլիոն ամերիկեան տոլարի ներդրում մը ապահոված է Softbank-էն եւ այլ մեծ հիմնադրամներէ: Այսպիսով, ընկերութիւնը կը գնահատուի շուրջ $1.5 միլիառ տոլար: Ասիկա առաջին դէպքն է, որ Հայաստանի մէջ ծնած արհեստագիտական ընկերութիւն մը կ’անցնի մէկ միլիառ տոլարի շուկայական արժէքը:

Սեպտեմբեր 1-էն սկսեալ «Թուային սերունդ» նախաձեռնութիւնը կը սկսի թուային գործիքներու (Office, Google Drive եւ այլն) դասընթացք մը, շատ աժան` 2900 դրամի արժէքով: Պէտք է հասնիլ անոր, որ ամբողջ բնակչութիւնը կարենայ այս բոլոր գործիքները անկաշկանդ օգտագործել:

 Armenians Forward Together-ին ներկայացուած ամենամեծ անակնկալը ինծի համար Zartnir նախաձեռնութիւնն էր, որուն նպատակն է Հայաստանի դպրոցներուն մէջ ստեղծել գիրք կարդալու խմբակներ: Կ’ընտրեն դպրոցներ, կը նուիրեն գիրքեր եւ կը կազմակերպեն ամէնշաբաթեայ քննարկումներ կարդացած գիրքերուն շուրջ: Patreon-ի մէջ դրամահաւաք ունին. https://www.patreon.com/zartnir

Կայացաւ հայկական արտադրանքի արտածման ուղղուած BuyArmenian.com հարթակի պաշտօնական բացումը:

«Գիտունիկ» առցանց դպրոց անունով հարթակ մը կայ, ուր Հայաստանէն կը միանան դասաւանդողներ (դաշնակէն մինչեւ լեզուներ եւ ուսողութիւն), որոնք շատ յարմար գիներով դասեր կը մատուցեն, Սփիւռքէն կը միանան այդ դասերու մասնակիցներ, միեւնոյն ժամանակ Սփիւռքէն բարձր դասարաններու դպրոցականներ կը փորձեն լեզուներ սորվեցնել Հայաստանի երեխաներուն:

SoloLearn ընկերութիւնը, որ ծրագրաւորման ուսուցման բջիջային յաւելուածներ կը սարքէ, 24 մլն ԱՄՏ ներդրում ստացաւ ամերիկեան հիմնադրամներէն:

SASTIC նախաձեռնութիւնը կը փնտռէ հայկական ընկերութիւններ, որոնք կարիք ունին իրենց տուեալներու օգտագործման, մեքենայական ուսուցման կիրառութիւններու մասին խորհրդատւութեան․ կը նախատեսուի SASTIC-ի անդամներու հանդիպում մը, Երեւանի մէջ:

Մէկ տարի ընդմիջումէ ետք, դարձեալ կայացաւ «Պարքեմփ»ը: Կը կարծեմ, որ շատ օգտակար էր. միա՛յն ես շուրջ 30 նոր ծանօթութիւն կազմակերպեցի տարբեր բարեկամներուս միջեւ:

Կայացաւ Tech Week Artsakh միջոցառումը Ստեփանակերտի մէջ: 1400-է աւելի գրանցուած մասնակից կար, երեք օր իրար ետեւէ դասախօսութիւններ ու քննարկումներ լեփ-լեցուն դահլիճներուն մէջ, խիստ յագեցած օրակարգով:

Երիտասարդ գիտնականներու աջակցութեան ծրագիրի շրջագիծին մէջ ամփոփուեցաւ փոքր գիտական սարքերու եւ նիւթերու մրցոյթը: Կը նախատեսուէր 12-13 յայտ ֆինանսաւորել, բայց 50-էն աւելի յայտ կար, ու Գիտութեան կոմիտէն համաձայնեցաւ այլ աղբիւրներէ եւս գումարներ տրամադրել: Այդպիսով, պիտի ֆինանսաւորուի 24 յայտ:

Սփիւռքի Յանձնակատարի գրասենեակը եւ Repat Armenia հիմնադրամը հայրենադարձութեան ուղեցոյց մը պատրաստած են. կ’արժէ նման բաներ շատ պատրաստել` Սփիւռքի մեր ընկերներուն տարբեր ոլորտներու մէջ ներգրաւելու կերպերը պարզ ցոյց տալու համար:

3-5 Յուլիսին Ստեփանակերտի մէջ կայացաւ Tech Week Artsakh միջոցառումը. ծրագիրը կ'ընդգրկէր մասնագիտական համաժողովներ, «Արմաթ» ճարտարագիտական աշխատանոցի հիմնադրութիւն, գաղափարներու մրցոյթ, կրթական ծրագիրներ:

Հայրենի երիտասարդ գիտնական Հրանդ Խաչատրեան կը ներկայացնէ Հայաստանի եւ Սփիւռքի գիտական, կրթական եւ գործարար ոլորտներու նորութիւնները՝ շաբաթական կտրուածքով: Հրապարակումներուն կարեւորութիւնը կը կայանայ նաեւ անոր մէջ, որ հեղինակը կը լուսաբանէ կարեւոր իրադարձութիւններ, որոնք յաճախ պատշաճ ուշադրութեան չեն արժանանար զանգուածային լրատուական միջոցներուն կողմէ: