Ամերիկեան Astrobotic Technology ընկերութեան պատկանող Peregrine տիեզերանաւը, որ իբրեւ առաջին անհատական նախաձեռնութիւն, յատուկ առաքելութեամբ մը ճամբայ ելած էր Լուսնի վրայ էջք կատարելու, խանգարուած է վառելանիւթի փախուստի հետեւանքով, ու պարտադրաբար կը վերադառնայ Երկիր: Astrobotic յայտարարեց, որ շատ հաւանաբար, Peregrine այրի երկրի մթնոլորտ մուտքի ընթացքին:

8 Յունուարին, Vulcan Centaur հրթիռով (Boeing-ի եւ Lockheed-ի պատկանող) արձակումէն անմիջապէս ետք, հրթիռէն անոր բաժանուելէն կարճ ժամանակ անց տիեզերանաւուն մէջ տեղի ունեցած է պայթում մը եւ յստակ դարձած է, որ վառելանիւթի արտահոսքի պատճառով, ան պիտի չկարենայ հանգիստ վայրէջք կատարել Լուսնին վրայ, ինչպէս նախատեսուած էր: Astrobotic-ի մասնագէտները, սակայն, ՆԱԶԱ-ի անունով յայտարարեցին, որ օգտուած են այս առաքելութենէն՝ գիտական ​​փորձարկումներ կատարելով եւ տուեալներ հաւաքելով, զորս պիտի յայտարարեն հետագային:

Փենսիլվանիա նահանգի Փիթսպըրկ քաղաքը գտնուող Astrobotic ընկերութեան վերջին հաղորդագրութիւնը կը նշէ. «մեր վերջին գնահատականները ցոյց կու տան, որ տիեզերանաւը կը շարժի դէպի Երկիր, ուր ան հաւանաբար այրի մթնոլորտին մէջ»: Astrobotic կ’աւելցնէ, թէ ռոպոթը աւելի քան հինգ օրէ ի վեր արդէն տիեզերքի մէջ է եւ ներկայիս կը գտնուի մեր մոլորակէն 390 հազար քիլոմեթր հեռաւորութեան վրայ: Բացի գիտական ​​սարքաւորումներէ, տիեզերանաւը ապրանքներ կը փոխադրէր Astrobotic-ի յատուկ յաճախորդներու, ներառեալ՝ մարզական ըմպելիքի տուփ, ֆիզիքական պիթքոյն, մոխիր եւ մարդկային ու կենդանիներու DNA: Տիեզերանաւը նաեւ կը փոխադրէր ՆԱԶԱ-ի պատկանող 108 միլիոն տոլար արժողութեամբ գիտական ​​սարքաւորումներ:

Առայժմ միայն չորս երկրներ՝ Միացեալ Նահանգներ, Խորհրդային Միութիւն, Չինաստան եւ Հնդկաստան յաջողած են տիեզերանաւ վայրէջք կատարել Լուսնի մակերեսին: Անոնցմէ միայն Միացեալ Նահանգներն է, որ մարդ առաքած է հոն: Վերջին տարիներուն, իսրայէլեան եւ ճափոնական անհատական ընկերութիւններ նոյնպէս փորձած են վայրէջք կատարել Լուսնի վրայ, սակայն այդ առաքելութիւնները աւարտած են դժբախտ պատահարներով: