Չինացի գիտնականներ վերջերս յայտարարեցին, որ ստեղծած են աշխարհի ամենէն արդիւնաւէտ արուեստական բանականութեան (AI) ծառայող մանրաչիփերը (microchips), որոնք բաւականաչափ փոքր ըլլալով, կարելի է տեղադրել բջիջային հեռաձայներուն նման խելացի սարքերու մէջ: Այս չիփերը խոստմնալից կը թուին նոյնիսկ նորարարական անցանց (offline) գործառնութիւններու համար, ինչպէս՝ ձայնային հրահանգներով սարքին կառավարումը եւ նոյնիսկ մտքով կամ մտադրութիւններով անոր կառավարումը:

Բարձր կատարողական AI չիփերը գործելու համար կը պահանջեն մեծ քանակութեամբ ելեկտրական հոսանք՝ հաշուողական մեծ գործողութիւններ կատարել կարենալու համար: Ուժի այս մեծ պահանջը կը սահմանափակէ անոնց գործնական օգտագործումը, յատկապէս այն սարքերուն մէջ, ուր ելեկտրականութեան արդիւնաւէտութիւնը կարեւոր է, օրինակ` բջիջային հեռաձայնները կամ շարժական այլ սարքեր:  Չինաստանի Ելեկտրոնային գիտութեան եւ արհեստագիտութեան համալսարանի (UESTC) փրոֆ. Ճոու Ճին եւ իր օգնականները յաջողած են մեծ չափերով նուազեցնել ուժի սպառումը ալկորիթմներու եւ ճարտարապետական բարելաւումներու ճամբվ:

Առաջին չիփը, որ նախատեսուած է խելացի սարքերու մէջ անցանց ձայնային գործածութեան նպատակով, կը գերազանցէ բանալի բառերու ճանաչման եւ խօսողին ձայնին ստուգման իր կարողութեամբ: Ի տարբերութիւն սովորական դարձած ձայնի ճանաչման դրութիւններուն, այս չիփը ճշգրտօրէն կրնայ ճանչնալ խօսողին ձայնը եւ անոր փոխանցած թելադրանքը նոյնիսկ աղմկոտ միջավայրի մէջ, ինչպէս պատկերասփիւռի, երաժշտութեան կամ խօսակցութեան բարձր ձայները:

Այս չիփը կը թուի խոստմնալից ըլլալ ցած ուժ պահանջող ձայնային կառավարման յաւելուածներու (applications) համար՝ խելացի տուներու, կրելի սարքերու եւ խելացի խաղալիքներու մէջ:

Չինացի մասնագէտներուն պատրաստած երկրորդ փոքրատիպ չիփը նախատեսուած է լուսնոտութենէ տառապող հիւանդներու պարագային յայտնաբերելու նոպաներու ազդանշանները: Պատրաստուած է կրելի սարքերու համար եւ կ’օգտագործէ EEG (electroencephalogram) դրութիւնը` նոպաները կանխատեսելու եւ ահազանգ փոխանցելու բժշկական օգնութեան նպատակով: