«Ազդակ», 6/10/2025

***Իսրայէլ այդ ծրագիրը առաջարկեց… Իսրայէլը արդարացնելու համար (էջ 1):

Անդրադարձ դերանունը նման կրկնաբանութենէ խուսափելու համար ստեղծուած է:

Ուրեմն՝

—Իսրայէլ այդ ծրագիրը առաջարկեց…   ինքզինք  արդարացնելու համար:

***Արտաքին գործոց նախարարութիւնը երէկ հրատարակեցին  հաղորդա-գրութիւն մը (էջ 8):

Նախարարութիւն-ը հաւաքական անուն է. ան կրնայ բովանդակել բազմաթիւ պաշտօնեաներ՝  մէկ-երկու պիտանի ուտողներ ու անհամար անպէտ ձրիակերներ… սակայն ասոնք բոլորը քերականօրէն եզակի կը նկատուին:

—Արտաքին գործոց նախարարութիւնը երէկ հրատարակեց հաղորդգարութիւն մը:

Հաւաքական անուն են նաեւ՝

—աշակերտութիւն                      –կանաչեղէն

–բանակ                                     –տեսականի

–անձնակազմ                            –նամականի

–խումբ                                       –ընտանիք

Բազում այլովք հանդերձ:

***Ինչ կը վերաբերի… Համասի ապագային, զինաթափման ու անոր ղեկավարութեան ապագային …(Էջ 8):

—Ինչ կը վերաբերի… Համասի ու անոր ղեկավարութեան ապագային ու զինաթափման… :

***Բանակցութիւններու հիմամբ պիտի իմանանք, եթէ Համասը լո՞ւրջ է, թէ՞ ոչ (էջ 8):

Իսկ ե՞րբ  քաղաքական էջիդ հայագէտները պիտի իմանան, որ եթէ-ն (si…if…) օտարաբանութիւն է, որուն հայերէնն  է թէ :

—Բանակցութիւններու հիմամբ պիտի իմանանք, թէ Համասը լո՞ւրջ է, թէ՞ ոչ:

                                                               *   *   *

***Շարժումը իր համաձայնութիւնը կը յայտարարէ ազատ արձակելու բռնագրաւումի բոլոր գերիները… նախագահ Թրամփի առաջարկին մէջ նշուած փոխանակման ձեւաչափին հիմամբ եւ գետնի վրայ փոխանակման գործողութեան պայմաններ ապահովելով:

—Շարժումը իր համաձայնութիւնը կը յայտարարէ ազատ արձակելու բռնագրաւումի բոլոր գերիները… նախագահ Թրամփի առաջարկին մէջ նշուած փոխանակման ձեւաչափին հիմամբ եւ գետնի վրայ ապահովելով փոխանակման գործողութեան պայմաններ:

Խոնարհաբար Ձերդ՝

Սրտցաւ ընթերցող  մը