Խաժակ Այնթապեան (Այնճար, Լիբանան) կը ներկայանայ այսպէս. "1993 թուականին մեկնեցայ մութ ու ցուրտ Հայաստան եւ աւարտելէ ետք Երեւանի պետական բժշկական համալսարանի ատամնաբուժական բաժինը, ձախող փորձ մը կատարեցի հաստատուելու հայրենիքին մէջ: Այդ տարիներու տնտեսական ծանր վիճակը ստիպեց, որ վերադառնամ ծննդավայրս, ուր նախ հիմնեցի ատամնաբուժական դարմանատունս, եւ ապա, ընդառաջելով այլ կարիքի մը, բացի նաեւ ազգային դարմանատուն մը, ֆէյսպուքեան տարածքին մէջ, յատուկ այս առիթով սրած գրիչով ծակելու համար ազգային ջոջերուն ականջներն ու խիղճերը.... Թէեւ ցարդ ծակոցներէս ոչ մէկ բարձրաստիճան ազգայինի ականջները բացուած են, սակայն պիտի շարունակեմ ազգային բժշկական այս գործունէութիւնս. թերեւս գրիչս է, որ բաւարար սուր չէ...":