Hollywood-ի մէջ, կենսագրական ֆիլմեր միշտ ալ պատրաստուած են։ Անոնք անհրաժեշտ են՝ առնուազն իբր ծանօթացում եւ ընդհանուր զարգացում, նոյնիսկ եթէ հիմնուած ըլլան տուեալ անձի կեանքին միայն որոշ երեսներուն կամ նիւթը աւելի հետաքրքրական դարձնելու նպատակով երբեմն «գեղեցկացուած» յաւելումներուն։ Սակայն երբ ամբողջովին ճշգրիտ եւ վաւերագրական պատմութիւն կը ներկայացնեն, անոնց արժէքն ու ազդեցութիւնը աւելի կը շեշտուին։

Վերջին տարիներուն, կենսագրական ֆիլմերու արտադրութիւնը յաճախակի եւ հետեւողական դարձած է, եւ այս երեւոյթը անկասկած պատահական չէ։

Պատահական չէ, որովհետեւ արդէն գոյութիւն ունի հանդիսատեսի պատրաստ խաւ մը, որ երբեք չէ հետաքրքրուած Marvel-ի աշխարհով, երեւակայական կամ fiction ֆիլմերով։ Այս խաւը կը նախընտրէ իրապաշտ պատմութիւններ, վաւերական դէպքեր եւ իսկական անձեր։ Աւելին՝ եթէ ներկայացուող դէպքը կամ անձը արդէն ունի իր երկրպագուները, ապա ֆիլմին առեւտրական յաջողութիւնը մասամբ ապահովուած կ’ըլլայ։

Կենսագրական ֆիլմերու հանդիսատեսը կարելի է բաժնել երկու խումբի. առաջինը՝ անոնք, որոնք արդէն ծանօթ են նիւթին եւ ֆիլմը կը դիտեն իրենց գիտելիքը պատկերով ու պատմութեամբ վերապրելու համար, երկրորդը՝ անոնք, որոնք ֆիլմին միջոցով առաջին անգամ կը ծանօթանան անձին կամ դէպքին։ Միայն իսկապէս հետաքրքրուած դիտողն է, որ յաւելեալ ուսումնասիրութեամբ կը փորձէ հասկնալ թէ ներկայացուած պատմութիւնը որքանով ճշգրիտ է, եւ որքանով շինծու՝ Hollywood-եան առեւտուրին նպաստելու համար։ Հոս է, որ կարեւոր կը դառնան «based on a true story» («based on real events») կամ «true story» բնորոշումները։

Կենսագրական ֆիլմերու արտադրութեան ծախսերը, համեմատաբար ուրիշ ֆիլմերու, կրնան աւելի նուազ ըլլալ, որովհետեւ շեշտը կը դրուի դերասանական խաղի եւ storytelling-ի վրայ։ Երբ դերասանը կը նմանցուի իրական անձին՝ ֆիզիքապէս եւ կազմուածքով (մարզիկի պարագային), ձայնով (երգիչի կամ յատուկ առոգանութիւն ունեցող անձի պարագային), կամ make-up-ով, այդ ֆիլմին մրցանակաբաշխութիւններու մէջ յայտնուելու հաւանականութիւնը զգալիօրէն կը բարձրանայ։

Բնականաբար, կենսագրական ֆիլմերը չեն սահմանափակուիր միայն անձնական պատմութեամբ։ Անոնք կ’անդրադառնան նաեւ ժամանակաշրջանի հասարակական, ընկերային, տնտեսական ու քաղաքական իրադարձութիւններուն եւ անոնց ազդեցութեան՝ պատերազմներ, ցեղային խտրականութեան դէմ պայքար, քաղաքացիական իրաւունքներու շարժումներ, սեռային խտրականութիւն, հռչակ, մտային առողջութիւն, բարոյական հարցեր, թմրեցուցիչ եւ այլն։ Միաժամանակ կը շեշտեն նաեւ դրական կողմերը՝ երազներու հետապնդում, յամառութիւն, ամուր կամք, մշակութային ինքնութիւն եւ ազգային դիմագիծ։ Այս գաղափարները համաշխարհային «լեզու» են, որոնք կրնան հարազատ թուիլ որեւէ ազգի։ Երաժշտական կենսագրական ֆիլմերու պարագային, յաճախ կը վերամշակուին հին կամ դասական երգեր՝ նոր սերունդին հաճելի դարձնելու նպատակով, ստեղծելով գործակցութիւն սինեմայի եւ երաժշտութեան միջեւ։

Կենսագրական ֆիլմերու շարունակական արտադրութեան մէկ այլ պատճառ ալ կայ. դարուս «հիւանդութիւնը»՝ հանրային դէմքերու անձնական կեանքով չափազանց հետաքրքրուիլը։ Այս ֆիլմերը կը ներկայացնեն ոչ միայն աստղին յաջողութիւնը, այլ նաեւ անկումները, ձախողութիւնները, անձնական եւ ընտանեկան կեանքը։ Այլ խօսքով՝ հանդիսատեսը կը տեսնէ աստղին քուլիսներու ետի իրականութիւնը։ Միաւորելով արուեստն ու առեւտուրը, Hollywood-ը բարդը կը դարձնէ մատչելի եւ զգացական ձեւով կը հաղորդէ պատմութիւնը՝ հանդիսատես շահելու համար։

Այսպէս, Hidden Figures (2016) եւ BlacKkKlansman (2018) կ’անդրադառնան ցեղային խտրականութեան դէմ պայքարի եւ քաղաքացիական իրաւունքներու հարցերուն։ Առաջինը կը ներկայացնէ NASA-ի երեք կին սեւամորթ մաթեմատիկոսներու իրական պատմութիւնը, իսկ երկրորդը՝ 1970-ականներուն սեւամորթ գաղտնի ոստիկանի մը ներթափանցումը Ku Klux Klan-ի մէկ կազմակերպութեան մէջ եւ անոր լուծումը։ Նոյն ուղղութեան մէջ է նաեւ պատրաստուող Unforgettable ֆիլմը՝ Nat King Cole-ի կեանքէն դէպքեր ներկայացնող։

Մարզական ոլորտէն օրինակներ են՝ I, Tonya (2017)՝ գեղասահորդ (figure skater) Tonya Harding-ի մասին, King Richard (2021)՝ tennis-ի ախոյեաններ Venus եւ Serena Williams քոյրերու հօր եւ  մարզիչ Richard Williams-ի մասին, The Smashing Machine (2025)՝ MMA մարզիկ Mark Kerr-ի մասին։ Նախատեսուած է նաեւ նոր ֆիլմ մը՝ Lance Armstrong-ի մասին։ Նախապէս նկարահանուած էր The Program (2015), սակայն նոր ծրագիրը կը պատրաստուի մարզիկին համաձայնութեամբ։

Երաժշտական կենսագրական ֆիլմերու շարքին են՝ Bohemian Rhapsody (2018)՝ Freddie Mercury եւ Queen խումբին մասին, Rocketman (2019)՝ Elton John-ի մասին, Elvis (2022)՝ Elvis Presley-ի մասին, Maestro (2023)՝ Leonard Bernstein-ի մասին, Maria (2024)՝ Maria Callasի մասին, A Complete Unknown (2024)՝ Bob Dylan-ի մասին, եւ Springsteen: Deliver Me from Nowhere (2025)՝ Bruce Springsteen-ի մասին։ Պատրաստութեան մէջ են նաեւ Michael Jackson-ի ու Michael եւ Joni Mitchell-ի մասին ֆիլմեր։

Գեղանկարչութեան ոլորտէն օրինակներ են՝ Loving Vincent (2017), At Eternity’s Gate (2018) եւ վերջերս՝ Modi (2025)՝ Modigliani-ի մասին։ Չմոռնալով քաղաքական անձնաւորութիւններ ներկայացնող ֆիլմերը, ինչպէս՝ Churchill եւ Darkest Hour (2017)` Winston Churchill-ի մասին, Vice (2018)՝ Dick Chene-ի մասին, The Apprentice (2024) Donald Trump-ի մասին:

Շատ սպասուած ֆիլմ մըն ալ կը վերաբերի խոհարար, գրող եւ մշակոյթի ուսումնասիրող Anthony Bourdain-ին, Tony ֆիլմը։

Hollywood-ի ժամանակակից կենսագրական ֆիլմերը կը շարունակեն բազմանալ եւ տարածուիլ, որովհետեւ անոնք պատմութիւնը կը ներկայացնեն զգացական ձեւով, այնպէս մը որ իրենք զիրենք կը պարտադրեն ինչպէս fiction ֆիլմերը: