«Ազդակ», 17/9/2025

***Անոնք քննարկեցին երկու երկիրներու երկկողմանի յարաբերութիւնները (էջ 1):

Երբ երկու երկիրներ կը քննարկեն  իրենց յարաբերութիւնը, այդ յարաբերութիւնը չի կրնար երկկողմանի չըլլալ  եւ ըլլալ՝ եռակողմանի, քառակողմանի, հնգակողմանի կամ…բազմակողմանի :

Ուրեմն մտքի յաւելեալ, քիչ մըն ալ ծիծաղելի  բեռ մըն է երկկողմանի ածականը:

***Բոլոր լիբանանցիներու բարեկամը ըլլալ եւ ոչ թէ մէկ խումբի մը (էջ 1):

Մէկ եւ մը զիրար    կը կրկնեն:  Երկուքէն  մէկը աւելորդ է:

Կա՛մ մէկը, կա՛մ միւսը:

***Ճամբան կը համապատասխանէ բոլոր չափանիշերուն:

Ուրախութեամբ կ’արձանագրեմ չափանիշեր յոգնակին, անցեալի սխալ ձեւի փոխարէն, ուր չափանիշներ  կը գրուէր:

Միայն թէ լաւ սովորութիւնները պէտք է  պահպանուին:

19/9/2025-ի թիւին մէջ, էջ 8, նոյն ձեռքն ու գրիչը գրած է՝

–«Ֆինանսաւորման պատժամիջոցներու չափանիշներուն»:

***Ուղղակի կերպով    կը հաղորդակցինք (էջ 8):

Փորձենք հաղորդակցիլ առանց պոչի՝

—Ուղղակի կը հաղորդակցինք:

***Անոնք պէտք է որոշեն, եթէ  կ’ուզեն… ատիկա կատարել  կամ ոչ (էջ 8):

Նորէն այս եթէ (si…if…) օտարաբանութիւնը:

—Անոնք պէտք է որոշեն, թէ կ’ուզեն այդ կատարել կամ ոչ:

«Ազդակ», 19/9/2025

***Վրաստան փակած է կնքուած համաձայնագիրի համաձայն  պարտքի մնացեալ մասը (էջ1):

—Վրաստան փակած է պարտքի մնացեալ մասը ըստ  կնքուած համաձայնագիրի:

***Նասսար գնահատեց  Պուլկարիոյ համակարգումի քայլերուն (էջ 2):

Գնահատել ներգործական է եւ հայցական հոլով խնդիր կը պահանջէ:

Ուրեմն՝

—Նասսար գնահատեց Պուլկարիոյ համակարգումի քայլերը:

***Բոլորը համոզուած են, թէ ոեւէ մէկը պիտի չկարենայ մեզմէ ասեղ մը անգամ առնել (էջ 2):

Այսքան խոր համոզումը կը վանէ ամէն թէականութիւն, կասկած ու շփոթ. ուրեմն թէ շաղկապը գործ չունի այստեղ: Պէտք է որ  կիրարկել:

—Բոլորը համոզուած են, որ ոեւէ մէկը պիտի չկարենայ  մեզմէ ասեղ մը անգամ առնել:

***Ժամանակն է  անոնց    պարգեւատրելու (էջ 8):

—Ժամանակն է զանոնք  պարգեւատրելու:

***Օրինագիծը կը պարտաւորեցնէ  նախագահին  որոշել…   (էջ 8):

Պարտաւորեցնել, ինչպէս պարտաւորել եւ ստիպե ներգործական են եւ հայացական հոլով կը պահանջեն  եերքն աալ:

Ուրեմն՝

—Օրինագիծը կը պարտաւորեցնէ նախագահը  որոշելու…

Արմենակ Եղիայեան